Jæja, er nú ekki kominn tími til að tjá sig um ástandið í þjóðfélaginu?

Nú hefur almenningur náð því fram að fá kosningar í vor. Enda eftir því sem mér skilst þá var það aðalkrafan. Hvað skyldi fólk hafa haft upp úr því.

Fólk hafði það út úr því að nú fara pólitíkusar að hugsa um að koma sem best út úr næstu kosningum. Margar óvinsælar ákvarðanir þarf að taka á næstunni til að gera áhrif kreppunnar sem minnstar en nú verður þeim frestað fram yfir kosningar sem mögulega er hægt að fresta.
Það hefur aftur þau áhrif að kreppan á eftir að verða okkur harðari en hún annars þurfti að verða. Peningum verður eytt sem bætast síðan á allt annað sem við þurfum að borga eftir kosningar.

Hef verið að tala við fólk sem er að reka fyrirtæki og þeir segja mér að þetta var það versta sem gat komið fyrir þá.  Kosningar fjölga þeim mánuðum sem þeir þurfa að reyna að þrauka í óvissu en hafa ekki bolmagn til þess. Sumir spá því að beinlínis að vegna kosninganna fara fleiri fyrirtæki á hausinn og fleira fólk missir vinnuna.

Nú hljóma ég eins og ég sé að skamma þá sem hafa verið að mótmæla og kannski er ég að því, en miklu heldur er ég að skamma stjórnarflokkana.
Það er þeirra verk að reyna að halda friðinn í þjóðfélaginu og hvort sem hægt er að kenna stjórninni um kreppuna eða ekki þá klárlega mistókst þeim að koma til móts við fólkið og því í dag engin leið önnur en að halda kosningar.
Geir og Ingibjörg áttu auðvitað að segja af sér sem ráðherrar um mánaðarmótin nóv-des og taka Björgvin og Árna Matt með sér, en áður áttu þau að taka til í Seðlabankanum.
Þá hefði komið fólk í stjórnina sem væri ferskt í störfum, með önnur sjónarhorn á vandann og meiri möguleiki að það hefði gustað af þeim, það mikið að þjóðin hefði fundið ferskan blæinn. Tala nú ekki um ef það hefði verið talað við þjóðina eftir slíkar breytingar.

Sem sagt, vegna klúðurs stjórnvalda þá verða að vera kosningar í vor.

En samt á að halda áfram að mótmæla og til hvers?

Ef ég skil þetta rétt (endilega leiðréttið mig sem vitið betur) þá er krafan sú að þessi stjórn sem nú er haldi ekki áfram fram að kosningum, fólk vill nýja stjórnarskrá og ýmsar fleiri breytingar sem eiga að byggja upp hið nýja Ísland.

Málið er hinsvegar það í dag að það er ekki hægt að mynda betri stjórn úr þeim flokkum sem eru við völd.
VG eru með það ólíka sýn á lífið miðað við hina flokkana að ef þeir ætla í stjórn með öðrum þá verða þeir að selja sig eða nánast gefa sem myndi líta mjög illa fyrir þá fyrir næstu kosningar. Þó ég hafi alltaf verið á móti stefnu VG þá hef ég alltaf borið virðingu fyrir þeim þar sem að fáir flokkar hafa verið eins trúir sinni stefnu eins og þeir. Ef það breytist þá eiga þeir enga von í næstu kosningum.

Utanþingsstjórn vilja sumir sem forsetinn yrði þá að skipa. En fólk virðist ekki gera sér grein fyrir því að sú stjórn hefði engin völd til að breyta því sem að fólk er að krefjast. Það yrði aðeins starfsstjórn og væri sennilega versti kosturinn í þeirri stöðu sem við erum í í dag.

Og hvaða vit er það að krefjast þess af pólitíkusum í dag að fá kosningar í vor, vegna þess að þeim sé ekki treystandi til að byggja upp nýtt Ísland, en krefjast þess svo í leiðinni að þau byggi upp nýtt Ísland fyrir kosningar? Er það bara ég sem sé einhverja mótsögn í þessu?

Nú er ljóst að kosningar verða í vor. Hvort sem það er slæmt eða gott. Er þá ekki kominn tími til að hætta mótmælum í bili? Fara að snúa sér að því að koma upp flokkum, listum og finna fólk sem treystandi er til að byggja upp nýtt Ísland eftir kosningar. Breyta gömlu flokkunum þannig að þeir verði hæfir til þess líka.
Nú er komin algjörlega nýtt lið í stjórn Framsóknar, Geir er búinn að segja af sér formennsku í Sjálfsstæðisflokknum og ef eitthvað vit er í Samfylkingu og VG þá fara þau í þá vinnu líka að finna nýtt fólk til að stjórna flokkunum.

Er ekki kominn tími til þess núna að vinna í því að byggja upp nýtt Ísland í stað þess að standa úti í kuldanum og öskra sig hása við að krefjast einhvers sem enginn má framkvæma sem stendur?
Eða er fólk bara farið að mótmæla til þess að mótmæla?

http://hehau.blog.is/blog/hehau/entry/759218/#comment2063228

Bið ykkur um að skoða þessa slóð.

Ofbeldi hefur aldrei rétt á sér og hvort sem það eru mótmælendur að kasta múrsteinum eða lögreglan að beita piparúða á fólk sem er að mótmæla friðsamlega.

Það koma ádeilur á mótmælendur fyrir það að hafa verið á svæði þar sem það er ekki velkomið og eiga þær að ég held fullan rétt á sér, en þegar fólk hins vegar er að mótmæla friðsamlega og, að því er virðist á þeim myndum sem ég hef séð frá piparúðun lögreglu (allavega að hluta), er ekki að beita ofbeldi á nokkurn hátt þá er ekkert sem réttlætir að það fólk sé beitt ofbeldi.

Vildi bara gefa ykkur kost á að skoða báðar hliðar málsins svo að þið getið gert ykkur sjálf upp skoðanir sem byggðar eru öllum þeim upplýsingum um málið en ekki bara þeim sem annar aðilinn matar ykkur á.

Að lokum óska ég ykkur bara gleðilegs árs og FRIÐAR!

Mikið var leiðinlegt að heyra á mótmælunum í gær þegar verið var að hvetja til valdaráns. Ég hélt að íslendingar væru friðarsinnar og hefðu þolinmæði til að leita sátta.

En hins vegar get ég vel skilið að fólk vilji breytingar og nú held ég að það sé kominn tími til að stjórnvöld komi til móts við fólkið sem á erfitt með að hemja reiði sína.

Þess vegna krefst ég þess einfaldlega að stjórnvöld og mótmælendur leiti leiða til að ná sáttum strax í þessari viku.

Það er ljóst að það kemur að því að taka þarf til í fjármálaeftirlitinu og Seðlabankanum og held ég að rétti tíminn væri til þess núna í vikunni.

Mjög sterkt held ég líka að það myndi virka að uppstokkun yrði í ríkisstjórninni. Formenn stjórnarflokkanna ættu að stíga af sínum stalli, fjármálaráðherra og jafnvel viðskiptaráðherra. Með því væru flokkarnir að taka pólitíska ábyrgð.

Ekki væri heldur vitlaust að ákveða tíma til kosninga. Vil þó að það sé lengra í þær en að þær verði í vetur eða vor. Því að ég vil að nýjir flokkar hafi tíma til að koma fram á sjónarsviðið með nýju fólki.

Ef Framsóknarflokkurinn og Sjálfstæðisflokkurinn ætla báðir að setja inngöngu í ESB á stefnuskrá hjá sér þá þurfum við flokk á hægri vængnum sem er á móti ESB aðild svo að hægri menn þurfi nú ekki að fara að kjósa VG . Ef flokka kerfið á að virka þá verða að vera flokkar sem snúast um málefni og þeir verða að vera það fjölbreyttir að sem flestir geti fundið eitthvað til að kjósa

Ég vil því hvetja stjórnvöld til að hafa hraðar hendur og sýna almennilegan lit núna strax í þessari viku. Það er ljóst að þolinmæði fólks er á enda og það er skylda stjórnvalda að halda frið í landinu.

Finnst að þessi hópur mótmælanda eigi hrós skilið fyrir markviss mótmæli sem skila sér vel til fjölmiðla. Virkar margfalt betur heldur en einhver æsingur  frábært hjá ykkur.

Þó reyndar að ég sé því algjörlega ósammála að það eigi að boða til kosninga strax og kemur það því ekkert við hvar ég stend í pólitík.

	Haldist í hendur
Ábyrgðarmaður færslu Tilkynna um óviðeigandi tengingu við frétt