Ástæða og/eða afsökun

Ótrúlega oft gerist það, bæði hér á moggabloggi sem og annars staðar, að þegar er verið að leita að ástæðum fyrir einhverjum hlutum að fólk heldur að maður sé að leita að afsökun.

Ástæða og afsökun eru bara tveir óskyldir hlutir.

T.d. var bloggað mikið við fréttir af stráknum frá Kóreu sem myrti 32 í skóla í Bandaríkjunum. Í fréttum var iðulega sagt frá hverjar ástæðurnar gætu verið fyrir því að drengurinn framdi þennan verknað og þótti mörgum bloggaranum að það væri verið að afsaka Kóreubúann.

Það er deginum ljósara að ekkert afsakar svona verknað en það er ástæða fyrir öllum hlutum og ef við eigum að eiga einhvern möguleika á að koma í veg fyrir að svona lagað gerist aftur þá þurfum við að komast að ástæðunni.

Eins má nefna barnaníðinga. Það hefur oft verið fullyrt að þeir hafi flestir sjálfir orðið fyrir barðinu á barnaníðingum í æsku. Það er heldur ekki afsökun fyrir þeirra verkum en gæti þó verið ástæða.

Ef einhver keyrir fullur og keyrir á barn og stór slasar það, þá er ekki hægt að afsaka slysið með áfenginu en það er þó ástæða. Þá höfum við eitthvað til að vinna með og eigum meiri möguleika á að koma í veg fyrir svipuð slys.

Svo er bara spurning hvort þessi blogg, sem rugla saman ástæðu og afsökun, sé ástæðan fyrir þessu bloggi eða afsökun mín fyrir því að blogga eitthvað

Athugasemdir

[Gunnar Th. Gunnarsson, 1.5.2007 kl. 18:04]

Góð afsökun

[Björg F (IP-tala skráð) 2.5.2007 kl. 01:15]

..það er ærin ástæða til að vekja athygli á því að þessi grein þín er algjör snild

[Ólafur fannberg, 2.5.2007 kl. 06:37]