Hverjir þurfa hjálp?

Nú er mikil umræða í þjóðfélaginu um atburði sem eiga að hafa átt sér stað í Breiðuvík fyrir u.þ.b. 40 árum síðan.

Eftir því sem segir í fjölmiðlum þá hafa margir, kannski er óhætt að segja flestir, drengjanna sem voru sendir vestur í Breiðuvík komist í kast við lögin og margir þeirra hafa brotið mjög alvarlega af sér.

Flestir virðast vera tilbúnir til að fyrirgefa þeim það í ljósi þess hvað þeir máttu þola í æsku og er það vel.

Flestir hins vegar virðast ekki vera tilbúnir til að fyrirgefa þeim sem brutu á drengjunum. Mikil reiði er í þjóðfélaginu vegna þessa máls og mikið talað um ógeðin sem gerðu drengjunum þetta.

En ég spyr, hvað varð til þess að t.d. Þórhallur forstöðumaður varð þessi maður sem hann varð? Lenti hann í einhverju svipuðu sjálfur í æsku? Er hann kannski einn af þeim sem þarf hjálp?

Þekki sjálfur til manns sem mátti þola líkamlegt og andlegt ofbeldi á sínu heimili í æsku. Hann er að glíma við sömu málin og margir drengirnir sem voru í Breiðuvík. Hann gekk á kvalara sinn og krafðist svara afhverju hann hefði gert honum þetta. Svarið sem hann fékk var að sá sem verknaðinn framdi kom bara fram við drenginn eins og hafði verið komið fram við hann sjálfan þegar hann var barn. Hann beitti bara sömu uppeldisaðferðunum og honum voru kennd í æsku. Hann kunni ekkert annað.

Enn og aftur. Pössum okkur að missa okkur ekki í reiðinni. Dæmum ekki fólk eftir því sem sagt er í fjölmiðlum, við þekkjum ekki alla málavöxtu. Eitt er víst að ef allt er satt sem sagt er um Þórhall í Breiðuvíkurmálinu og Guðmund í Byrginu og fleiri þá eru þetta menn sem þurfa mikla hjálp.

Athugasemdir

[Jóhanna Fríða Dalkvist, 10.2.2007 kl. 15:04]

Góður punktur sem gleymist oftast að hugsa um.

[Birta (IP-tala skráð) 10.2.2007 kl. 22:29]

Kerfið brást börnunum, þeir voru sendir og ekkert fylgst með og forstöðumaðurinn var með stýrimannspróf en ekki menntun sem snéri að barnauppeldi eða neinu slíku. Og ég held að hjá almenningi snúist reiðin aðallega um íslenska kerfið en ekki en ekki forstöðumanninn, en að sjálfsögðu eru fórnarlömbin reið við gerandan, og við yrðum það sjálf ef þetta væri gert við okkur og myndum lítið hugsa um hvernig gerandinn hafi alist upp...... 

[Ágúst Dalkvist, 12.2.2007 kl. 01:29]

Birta:

Ekkert er eðlilegra en að fórnarlömbin séu reið gerandanum.

Veit þó að MJÖG margir eru ekki einungis reiðir kerfinu, það hafa mjög mörg skrifin sannað og eins kom fram hér á einu bloggi sem ég les reglulega að sumt fólk leggðist meira að segja svo lágt að hringja í núverandi ábúendur á Breiðavík til að hóta þeim öllu illu.

 Vala Dröfn:

Sammála þér að það er ekki afsökun fyrir að brjóta á næsta manni að maður hafi sjálfur lent í einhverju svipuðu en oft virðist það þó vera ástæða.

Þú hittir líka held ég akkúrat naglann á höfuðið þegar þú nefnir breyttan tíðaranda.

Ekki ætla ég þó neitt að verja þau brot sem bitnuðu á drengjunum á Breiðavík, þau voru hræðileg. Pistill minn var eingöngu ætlaður til að benda á að reitt fólk hugsar ekki rökrétt. Ef við viljum breyta heiminum til góðs verðum við að halda ró okkar og skoða alla fleti málsins og gera okkur þannig grein fyrir hvar og hvernig er best að laga hlutina.